బాలీవుడ్ నటుడు టైగర్ ష్రాఫ్పై జరిగిన కాల్పుల కేసులో కీలక ఆర్థిక లావాదేవీలు వెలుగులోకి వచ్చాయి. విదేశీ క్రిప్టోకరెన్సీ వాలెట్ నుంచి ఎస్బీఐ ఖాతాకు రూ.47 లక్షలకు పైగా నగదు బదిలీ అయినట్లు ముంబై పోలీసులు అనుమానిస్తున్నారు. ఈ క్రమంలో కేసులో 13వ నిందితురాలిగా సునేహా పండిట్ను అరెస్ట్ చేశారు.
విదేశాల్లో నిర్వహిస్తున్నట్లు అనుమానిస్తున్న క్రిప్టోకరెన్సీ వాలెట్ నుంచి భారతదేశంలోని ఎస్బీఐ ఖాతాకు నగదు బదిలీ అయినట్లు ముంబై పోలీసులు ఆరోపిస్తున్నారు. ఈ ఖాతా ద్వారా నిందితులకు వాహనం, వసతి ఏర్పాట్ల కోసం డబ్బు అందించినట్లు దర్యాప్తులో అనుమానిస్తున్నారు.
ఈ కేసులో ప్రధాన నిందితుడిగా పేర్కొంటున్న అనిల్ పండిట్కు బంధువైన 22 ఏళ్ల సునేహా పండిట్ను హర్యానాలోని కర్నాల్లో పోలీసులు అరెస్ట్ చేశారు. ఆమెను ఈ కేసులో 13వ నిందితురాలిగా గుర్తించారు. ప్రత్యేక న్యాయస్థానం ఆమెకు పోలీసు కస్టడీ విధించింది.
కంబోడియా ఫోన్ నంబర్, డెన్మార్క్ తో కార్యకలాపాలు
ప్రాసిక్యూషన్ వాదన ప్రకారం.. సునేహా భర్త అభిషేక్ పండిట్ పేరుతో ఉన్న క్రిప్టో వాలెట్ను విదేశాల నుంచి నిర్వహిస్తున్నట్లు అనుమానిస్తున్నారు. ఆ వాలెట్కు కంబోడియా ఫోన్ నంబర్ అనుసంధానమై ఉందని, డెన్మార్క్కు చెందిన ద్వారా దాని కార్యకలాపాలు జరిగినట్లు పోలీసులు కోర్టుకు తెలిపారు.
ఈ వాలెట్లోకి వచ్చిన డబ్బు వసూళ్ల ద్వారా సంపాదించిన అక్రమ సొమ్ము కావచ్చని పోలీసులు అనుమానిస్తున్నారు. అనంతరం ఆ మొత్తాన్ని అభిషేక్ పేరుతో ఉన్న ఎస్బీఐ ఖాతాకు బదిలీ చేసినట్లు ఆరోపిస్తున్నారు. ఆ బ్యాంకు ఖాతాకు అనుసంధానమైన ఫోన్ నంబర్ సునేహాదని, ఆమె భారత్లో ఆ ఖాతాను నిర్వహించినట్లు ప్రాసిక్యూషన్ వాదించింది.
రూ.47.26 లక్షల లావాదేవీలు గుర్తింపు
2023 నుంచి 2024 వరకు సంబంధిత ఎస్బీఐ ఖాతాలో రూ.47.26 లక్షలకు పైగా లావాదేవీలు జరిగినట్లు పోలీసులు కోర్టుకు తెలిపారు. నిందితుల్లో ఒకరికి రూ.30 వేల మొత్తాన్ని బదిలీ చేసి, కాల్పులకు ఉపయోగించినట్లు అనుమానిస్తున్న వ్యక్తుల కోసం మోటార్సైకిల్ కొనుగోలు, లాడ్జిలో బస ఏర్పాట్లకు వినియోగించినట్లు ఆరోపించారు.
ఈ ఖాతా నుంచి కేసులో అరెస్టయిన ఇతర నిందితులకు కూడా డబ్బు బదిలీ అయినట్లు పోలీసులు పేర్కొన్నారు. ముఖ్యంగా ఘటన జరిగిన రోజున కూడా లావాదేవీలు జరిగినట్లు ప్రాసిక్యూషన్ తెలిపింది.
నిందితురాలి తరఫు న్యాయవాది అభ్యంతరం
అయితే సునేహా తరఫు న్యాయవాది పోలీసుల ఆరోపణలను ఖండించారు. బ్యాంకు ఖాతా ఆమె భర్త పేరుతో ఉందని, అందులో జరిగిన లావాదేవీలతో ఆమెకు కాల్పుల ఘటనలో సంబంధం ఉందని నిరూపించే ఆధారాలు లేవని వాదించారు. కుటుంబ ఖాతాలో జరిగిన లావాదేవీలను నేరంతో ముడిపెట్టడం సరికాదని పేర్కొన్నారు.
అయినప్పటికీ, ఆర్థిక లావాదేవీలు, నిందితురాలి పాత్ర, పరారీలో ఉన్న అనిల్ పండిట్, అభిషేక్ల ఆచూకీ తెలుసుకోవడానికి కస్టడీ అవసరమని కోర్టు అభిప్రాయపడింది.
ఈ కేసులో ఇప్పటివరకు 13 మందిని అరెస్ట్ చేసినట్లు పోలీసులు తెలిపారు. కాల్పుల వెనుక ఉన్న ఆర్థిక నెట్వర్క్, పరారీలో ఉన్న నిందితుల పాత్రపై దర్యాప్తు కొనసాగుతోంది.
