ఫ్రాన్స్లో ప్రభుత్వ వ్యతిరేక నిరసనలు హింసాత్మకంగా మారడంతో రాజధాని పారిస్లోని రెండు కీలక ప్రాంతాల్లో పోలీసులు రాత్రిపూట కర్ఫ్యూ విధించారు. వారాంతంలో జరిగిన అల్లర్లు, దుకాణాల ధ్వంసం, దోపిడీల నేపథ్యంలో ప్రజల భద్రతను కాపాడేందుకు ఈ చర్యలు చేపట్టారు.
జీవన వ్యయం పెరుగుదల, పాఠశాలల్లో పరిస్థితులపై అసంతృప్తితో మొదలైన నిరసనలు పలు ప్రాంతాల్లో హింసకు దారితీశాయి. పారిస్లోని ప్లాస్ ద లా రిపబ్లిక్, లెస్ హాల్స్ ప్రాంతాల్లో రాత్రి 11 గంటల నుంచి మరుసటి రోజు ఉదయం 6 గంటల వరకు కర్ఫ్యూ అమలు చేశారు. ఈ సమయంలో ఆయా ప్రాంతాల్లోకి ప్రవేశించడం లేదా అక్కడ ఉండటాన్ని నిషేధించారు. అంతేకాకుండా రాత్రి 8 గంటల నుంచి నిర్దిష్ట ప్రాంతాల్లో సమావేశాలు, ప్రదర్శనలపైనా ఆంక్షలు విధించారు.
ఆంక్షలు
ప్లాస్ ద లా రిపబ్లిక్ ప్రాంతంలో గత శనివారం ఘర్షణలు చోటుచేసుకోగా, లెస్ హాల్స్ వాణిజ్య ప్రాంతంలో దుకాణాలు దోపిడీకి గురయ్యాయి. ప్రజలు, ఆస్తుల రక్షణ కోసమే ఈ నిర్ణయం తీసుకున్నట్లు పారిస్ పోలీసులు తెలిపారు.
దేశవ్యాప్త చర్యలు
ఫ్రాన్స్లోని పలు నగరాల్లో జరిగిన నిరసనలు హింసాత్మకంగా మారడంతో పోలీసులు పెద్ద ఎత్తున చర్యలు చేపట్టారు. దేశవ్యాప్తంగా సుమారు 2,400 మందిని అరెస్టు చేసినట్లు వార్తా నివేదికలు వెల్లడించాయి. దాదాపు 3,000 వ్యాపార సంస్థలు ధ్వంసం లేదా దోపిడీ కారణంగా నష్టపోయినట్లు అంచనాలు పేర్కొన్నాయి. ప్రభుత్వ భద్రతా చర్యలపై విమర్శలు కూడా వ్యక్తమయ్యాయి.
యువతపై ఆంక్షలు
పారిస్తో పాటు ఉత్తర ఫ్రాన్స్లోని లిల్లే, డౌయ్, వాటిగ్నీస్, డెనైన్ వంటి ప్రాంతాల్లో 18 ఏళ్లలోపు పిల్లలు, యువత రాత్రివేళ బయట తిరగకుండా స్థానిక అధికారులు ఆంక్షలు విధించారు. ఇతర నగరాల్లోనూ పరిస్థితిని బట్టి పరిమిత ఆంక్షలు అమలు చేశారు.
హింసను ముందుగానే అంచనా వేయడంలో, పరిస్థితులను అదుపు చేయడంలో పోలీసు వ్యవస్థ విఫలమైందన్న విమర్శలు ప్రభుత్వంపై ఒత్తిడిని పెంచాయి. ఫ్రాన్స్ అంతర్గత వ్యవహారాల మంత్రి లారెంట్ నూనెజ్ తన పదవికి రాజీనామా చేయడానికి ముందుకొచ్చినప్పటికీ, అధ్యక్షుడు ఇమ్మాన్యుయేల్ మాక్రాన్ దాన్ని అంగీకరించలేదు. భద్రతా వ్యవస్థలో లోపాలను పరిశీలించి, నిఘా చర్యలను మెరుగుపరచాలని సూచించారు.
జీవన వ్యయం పెరగడం, ఇంధన ధరలపై ఆందోళనలు, విద్యా సంస్థల్లో పరిస్థితులు వంటి అంశాలు నిరసనలకు నేపథ్యంగా నిలిచాయి. అయితే నిరసనల్లో చోటుచేసుకున్న హింసకు తీవ్ర వామపక్ష వర్గాలు, దోపిడీకి పాల్పడే వ్యక్తులు కారణమని ప్రధానమంత్రి సెబాస్టియన్ లెకోర్నూ ఆరోపించారు. ఈ వాదనపై ప్రతిపక్షాలు, ఇతర వర్గాలు భిన్న అభిప్రాయాలు వ్యక్తం చేశాయి. శాంతియుతంగా నిరసన తెలిపే హక్కును కాపాడుతూనే ప్రజల భద్రతను నిర్ధారించాల్సిన బాధ్యత ప్రభుత్వంపై ఉందనే చర్చ కొనసాగుతోంది.
ఫ్రాన్స్ ప్రధానమంత్రి లెకోర్నూ న మాట్లాడుతూ, స్థానికంగా విధించిన పరిమిత కర్ఫ్యూలతో రాత్రివేళ శాంతిభద్రతలు మెరుగుపడ్డాయని తెలిపారు. అవసరమైతే మంగళవారం రాత్రి కూడా స్థానిక అధికారులు కర్ఫ్యూలను తిరిగి విధించవచ్చని ఆయన తెలిపారు. ప్రస్తుతం ఫ్రాన్స్ ప్రభుత్వం ఎదుర్కొంటున్న ప్రధాన సవాలు హింసను అరికట్టడంతో పాటు ప్రజల్లో భద్రతపై నమ్మకాన్ని పునరుద్ధరించడం. నిరసనలకు దారితీసిన సామాజిక, ఆర్థిక సమస్యల పరిష్కారం కూడా కీలకంగా మారింది.
