పశ్చిమ బెంగాల్లోని దక్షిణ జిల్లాలో దారుణం చోటుచేసుకుంది. కుటుంబ కలహాల నేపథ్యంలో భార్యను హత్య చేసిన ఓ వ్యక్తి, ఆమె తలను తీసుకుని స్థానిక ఆలయానికి వెళ్లి ప్రార్థనలు చేయడం కలకలం రేపింది. పోలీసులు నిందితుడిని అదుపులోకి తీసుకున్నారు.
దక్షిణ జిల్లాలోని గంగారాంపూర్ పట్టణం నారాయణ్పూర్ ప్రాంతంలో బుధవారం తెల్లవారుజామున ఈ ఘటన జరిగింది. రింటూ సర్కార్ (46) తన భార్య సీమా సర్కార్ (42)తో గొడవపడి, పదునైన ఆయుధంతో ఆమెను హత్య చేసినట్లు ప్రాథమిక సమాచారం. అనంతరం ఆమె తలను తీసుకుని స్థానిక ఆలయానికి వెళ్లినట్లు తెలుస్తోంది.
ఉదయం ఆలయ ప్రాంగణంలో భార్య తలతో కూర్చున్న అతడిని చూసిన స్థానికులు భయాందోళనకు గురయ్యారు. వెంటనే పోలీసులకు సమాచారం అందించారు. ఘటనా స్థలానికి చేరుకున్న గంగారాంపూర్ పోలీసులు నిందితుడిని అదుపులోకి తీసుకున్నారు. మహిళ మృతదేహాన్ని పోస్టుమార్టం నిమిత్తం ఆసుపత్రికి తరలించారు. హత్యకు ఉపయోగించిన ఆయుధం కోసం పోలీసులు దర్యాప్తు చేపట్టారు.
పోలీసుల విచారణలో వెల్లడైన వివరాల ప్రకారం, రింటూ సర్కార్ గతంలో నార్త్ బెంగాల్ స్టేట్ ట్రాన్స్పోర్ట్ కార్పొరేషన్లో బస్సు కండక్టర్గా పనిచేసేవాడు. సుమారు మూడేళ్ల క్రితం క్రమశిక్షణా చర్యల కారణంగా ఉద్యోగం కోల్పోయాడు. అప్పటి నుంచి అతడి ప్రవర్తనలో మార్పులు వచ్చాయని, తరచూ కోపంగా ఉండేవాడని స్థానికులు పోలీసులకు తెలిపారు. ఆర్థిక ఇబ్బందులు, కుటుంబ కలహాలు కూడా ఉండేవని సమాచారం.
ఈ దంపతులకు ఇద్దరు మైనర్ పిల్లలు ఉన్నారు. ఘటన సమయంలో పిల్లలు కూడా అక్కడ ఉన్నట్లు సమాచారం. నిందితుడిని గతంలో స్థానికులతో గొడవల నేపథ్యంలో రెండుసార్లు అరెస్టు చేసినట్లు వచ్చిన ఆరోపణలను కూడా పోలీసులు పరిశీలిస్తున్నారు.
ప్రస్తుతం నిందితుడిని అదుపులోకి తీసుకున్న పోలీసులు హత్యకు గల అసలు కారణాలను తెలుసుకునేందుకు అన్ని కోణాల్లో దర్యాప్తు చేస్తున్నారు.
