భారత్, ఇండోనేషియా దేశాల మధ్య జరిగిన 11వ సంయుక్త ప్రత్యేక దళాల సైనిక విన్యాసాలు గరుడ శక్తి2026 విజయవంతంగా ముగిశాయి. ఇండోనేషియాలోని బన్యువాంగిలో జరిగిన ఈ విన్యాసాల్లో ఇరు దేశాల ప్రత్యేక దళాల సైనికులు పాల్గొన్నారు.
భారత పారాచూట్ రెజిమెంట్కు చెందిన ప్రత్యేక దళాలు, ఇండోనేషియా ప్రత్యేక దళాల సైనికులు ఈ విన్యాసాల్లో పాల్గొన్నారు. అడవుల్లో యుద్ధ తంత్రాలు, లక్ష్య ఛేదన, పర్వతారోహణ, వైమానిక దాడులు, అడ్డంకులను అధిగమించడం వంటి అంశాలలో సైనికులకు శిక్షణ ఇచ్చారు. ఈ శిక్షణలో భాగంగా ఆయుధాలు, సైనిక పరికరాలు, వ్యూహాలపై పరస్పరం తమ అనుభవాలను పంచుకున్నారు. సైనికుల సమన్వయం, సామర్థ్యం, సంసిద్ధతను పరీక్షించేందుకు వాస్తవ యుద్ధ పరిస్థితులను పోలిన విన్యాసాలు నిర్వహించారు. ఈ సంయుక్త సైనిక విన్యాసాల ద్వారా భారత్, ఇండోనేషియా దేశాల మధ్య రక్షణ రంగ సహకారం మరింత బలోపేతం అవుతుందని భావిస్తున్నారు. ఇది ఇరు దేశాల మధ్య వ్యూహాత్మక భాగస్వామ్యాన్ని మరింత పెంపొందించే అవకాశం ఉంది.