తమిళనాడు రాజకీయాల్లో కీలక పరిణామం చోటుచేసుకుంది. అన్నాడీఎంకే నుంచి ఇటీవల తమిళగ వెట్రి కళగంలో చేరిన పలువురు మాజీ మంత్రులకు పార్టీ అధ్యక్షుడు విజయ్ బాధ్యతలు అప్పగించారు. మొత్తం 15 మంది ఉప ప్రధాన కార్యదర్శుల నియామకంలో 11 మంది మాజీ మంత్రులు ఉన్నారు.
అన్నాడీఎంకే నుంచి తమిళగ వెట్రి కళగంలో చేరిన పలువురు మాజీ మంత్రులకు, ఆ పార్టీ అధ్యక్షుడు విజయ్ బాధ్యతలు అప్పగించారు. మొత్తం 15 మందిని పార్టీ ఉప ప్రధాన కార్యదర్శులుగా నియమించగా.. వారిలో 11 మంది అన్నాడీఎంకే మాజీ మంత్రులు ఉన్నారు.
ఉప ప్రధాన కార్యదర్శులుగా నియమితులైన మాజీ మంత్రుల్లో ఎంఎస్ఎం ఆనందన్, ఎంసీ సంపత్, ఉడుమలై కె. రాధాకృష్ణన్, కేవీ రామలింగం, ఎం. ఆనందన్, కడంబూర్ రాజు, కేటీ పచ్చైమాల్, వెల్లమండి ఎన్. నటరాజన్, ఎన్ఆర్ శివపతి, వైగైచెల్వన్, ఎస్. వళర్మతి ఉన్నారు. వీరితో పాటు డాక్టర్ జె. సందీప్ ఆనంద్, కేజీ ముత్తు వెంకటేశ్వరన్, తొళ్లమూర్ కన్నన్, వీసీఆర్ కుమరన్లకు కూడా ఉప ప్రధాన కార్యదర్శుల బాధ్యతలు అప్పగించారు.
నియమితులైన నేతలు, ఇప్పటికే పార్టీ బాధ్యతలు నిర్వహిస్తున్న కార్యవర్గ సభ్యులతో సమన్వయంతో పనిచేయాలని విజయ్ సూచించారు. పార్టీ ప్రధాన కార్యదర్శి ఎన్. ఆనంద్ మార్గదర్శకత్వంలో, అధ్యక్షుడి సూచనలు, సలహాలకు అనుగుణంగా సంస్థాగత కార్యక్రమాలను ముందుకు తీసుకెళ్లాలని ఆయన పేర్కొన్నారు.
బాధ్యతలు చేపట్టిన నేతలకు పార్టీ శ్రేణులు పూర్తి సహకారం అందించాలని కూడా విజయ్ కోరారు. పార్టీ సంస్థాగత వ్యవహారాలను మరింత విస్తరించే క్రమంలో ఈ నియామకాలు చేపట్టినట్లు పార్టీ వర్గాలు వెల్లడించాయి.
ఇదిలా ఉండగా, మడత్తుకుళం శాసనసభ నియోజకవర్గాన్ని కలుపుతూ, తిరుప్పూర్ పూర్వ నగర దక్షిణ జిల్లాను జిల్లా విభాగంగా ఏర్పాటు చేశారు. ఈ జిల్లాకు మాజీ ఎంపీ, ఎమ్మెల్యే సి. మహేంద్రన్ను జిల్లా కార్యదర్శిగా నియమించారు.
తాజా నియామకాలతో మొత్తం 15 మంది ఉప ప్రధాన కార్యదర్శులుగా బాధ్యతలు చేపట్టనున్నారు. వీరిలో 11 మంది అన్నాడీఎంకే మాజీ మంత్రులు ఉండటం గమనార్హం. అన్నాడీఎంకే నుంచి తమిళగ వెట్రి కళగంలో చేరిన నేతలకు పార్టీ పదవులు కేటాయిస్తున్న నేపథ్యంలో, ఈ నియామకాలు తమిళనాడు రాజకీయ వర్గాల్లో చర్చకు దారితీశాయి.
