ప్రముఖ స్మార్ట్ఫోన్ తయారీ సంస్థ షియోమీ తన కొత్త ఫ్లాగ్షిప్ 18 ప్రో సిరీస్ను న చైనాలో విడుదల చేయనుంది. ఈ సిరీస్లో షియోమీ 18 ప్రో, షియోమీ 18 ప్రో మ్యాక్స్ మోడళ్లు రానున్నాయి. భారత మార్కెట్లో విడుదల తేదీని కంపెనీ ఇంకా అధికారికంగా ప్రకటించలేదు.
ఈ సిరీస్లో బ్యాటరీ సామర్థ్యం ప్రధాన ఆకర్షణగా నిలవనుంది. షియోమీ 18 ప్రోలో 7,000 ఎంఏహెచ్, 18 ప్రో మ్యాక్స్లో ఏకంగా 8,500 ఎంఏహెచ్ బ్యాటరీని అందించనున్నట్లు సమాచారం. రెండు ఫోన్లలో సిలికాన్ అధికంగా ఉండే కొత్త తరం బ్యాటరీ సాంకేతికతను ఉపయోగిస్తున్నట్లు కంపెనీ వెల్లడించింది.
2 నానోమీటర్ చిప్సెట్
షియోమీ 18 ప్రో సిరీస్లో 2 నానోమీటర్ ప్రక్రియతో తయారైన ఫ్లాగ్షిప్ మొబైల్ ప్లాట్ఫామ్ను ఉపయోగించనున్నారు. అయితే చిప్సెట్ పేరును షియోమీ ఇంకా అధికారికంగా వెల్లడించలేదు. తాజా నివేదికలు మాత్రం ఇది క్వాల్కామ్ స్నాప్డ్రాగన్ 8 ఎలైట్ జెన్ 6 కుటుంబానికి చెందిన చిప్గా ఉండొచ్చని పేర్కొంటున్నాయి.
200 మెగాపిక్సెల్ కెమెరాల ప్రత్యేకత
కెమెరాల విషయంలోనూ భారీ అప్గ్రేడ్ కనిపించనుంది. లైకాతో కలిసి అభివృద్ధి చేసిన కెమెరా వ్యవస్థలో 200 మెగాపిక్సెల్ ప్రధాన కెమెరా, 200 మెగాపిక్సెల్ పెరిస్కోప్ టెలిఫొటో కెమెరా ఉండనున్నాయి. దీంతో జూమ్, దూరంలోని వస్తువుల ఫొటోగ్రఫీతో పాటు అధిక వివరాలతో చిత్రాలను తీసే సామర్థ్యంపై కంపెనీ దృష్టి పెట్టింది.
ప్రైవసీ డిస్ప్లే
18 ప్రో సిరీస్లో మరో ఆసక్తికరమైన ఫీచర్ హార్డ్వేర్ స్థాయి ప్రైవసీ డిస్ప్లే. స్క్రీన్ను పక్క వైపు నుంచి చూసినప్పుడు కంటెంట్ స్పష్టంగా కనిపించకుండా వీక్షణ కోణాన్ని పరిమితం చేసే విధంగా ఈ సాంకేతికతను డిస్ప్లేలోనే రూపొందించారు. పాస్వర్డ్లు, వ్యక్తిగత సందేశాలు వంటి సమాచారాన్ని బహిరంగ ప్రదేశాల్లో చూసేటప్పుడు ఇది ఉపయోగపడే అవకాశం ఉంది.
షియోమీ 18 ప్రో సిరీస్లో వెనుక భాగంలో ప్రత్యేక డిస్ప్లే కొనసాగనుంది. కొత్త వర్సటైల్ బ్యాక్ స్క్రీన్ ద్వారా నీరు తాగడం గుర్తు చేయడం, గుడ్డు ఉడికించే సమయం గుర్తించడం, పదాలు నేర్చుకోవడం, ఫోకస్ టైమర్ వంటి చిన్న అప్లికేషన్లను ఉపయోగించుకోవచ్చు. అంతేకాకుండా ఏఐ సహాయంతో అవసరానికి అనుగుణంగా కొత్త అప్లికేషన్ కార్డులను రూపొందించుకునే అవకాశం కూడా ఉంటుంది.
ముందు డిస్ప్లేలో కొత్త ఎం11 లైట్ ఎమిటింగ్ వ్యవస్థను ఉపయోగిస్తున్నారు. ఇది 4,000 నిట్స్ వరకు గరిష్ఠ ప్రకాశం అందించగలదని షియోమీ పేర్కొంది. బెజెల్స్ కేవలం 0.99 మిల్లీమీటర్ల వరకు తగ్గించనున్నట్లు కూడా కంపెనీ వెల్లడించింది.
షియోమీ 18 ప్రో, 18 ప్రో మ్యాక్స్ చైనాలో న సాయంత్రం 7 గంటలకు అధికారికంగా విడుదల కానున్నాయి. ధరలు, పూర్తి స్పెసిఫికేషన్లు, ఛార్జింగ్ వివరాలు వంటి అంశాలను లాంచ్ ఈవెంట్లో వెల్లడించే అవకాశం ఉంది. భారత్లో ఈ సిరీస్ ఎప్పుడు విడుదలవుతుందనే విషయంపై షియోమీ నుంచి ఇప్పటివరకు అధికారిక ప్రకటన రాలేదు.
మొత్తంగా చూస్తే.. 8,500 ఎంఏహెచ్ వరకు బ్యాటరీ, 2 నానోమీటర్ చిప్, 200 మెగాపిక్సెల్ కెమెరాలు, ప్రైవసీ డిస్ప్లే, ఏఐ ఆధారిత వెనుక స్క్రీన్ వంటి ఫీచర్లతో షియోమీ 18 ప్రో సిరీస్ ఫ్లాగ్షిప్ స్మార్ట్ఫోన్ విభాగంలో ప్రత్యేకతను చూపించేందుకు సిద్ధమవుతోంది.
