అనారోగ్యంతో ఉన్న కుమార్తెను భుజాలపై మోసిన తల్లి.. 14 కిలోమీటర్లు నడక - రాజకీయ ప్రభంజనం

కన్నబిడ్డకు అనారోగ్యం వస్తే ఏ తల్లి అయినా తల్లడిల్లిపోతుంది. బిడ్డను కాపాడుకోవడానికి ఎంతటి కష్టాన్నైనా ఎదుర్కొంటుంది. విజయనగరం జిల్లాలో ఓ గిరిజన తల్లి తన 12 ఏళ్ల కుమార్తెను ఆసుపత్రికి తీసుకెళ్లేందుకు చేసిన ప్రయాణం అందరినీ కదిలిస్తోంది. గ్రామానికి రహదారి సౌకర్యం లేకపోవడంతో అనారోగ్యంతో ఉన్న కుమార్తెను భుజాలపై మోసుకుంటూ ఏడు కిలోమీటర్లు నడిచింది. వైద్యం చేయించిన అనంతరం తిరిగి మరో ఏడు కిలోమీటర్లు నడిచి ఇంటికి చేరుకుంది.

అసలేం జరిగింది

విజయనగరం జిల్లా మండలం దారపర్తి పంచాయతీ పరిధిలోని పల్లపుదుంగాడ గిరిజన గ్రామానికి చెందిన జన్ని సుకరమ్మ, కన్నయ్య దంపతులకు సంపూర్ణ అనే 12 ఏళ్ల కుమార్తె ఉంది. ఇటీవల సంపూర్ణ అనారోగ్యానికి గురైంది. దీంతో ఆమెను ఆసుపత్రికి తీసుకెళ్లాల్సిన పరిస్థితి ఏర్పడింది.

అయితే, అర్నబ్ తుపాను ప్రభావంతో కురిసిన భారీ వర్షాలకు గ్రామానికి వెళ్లే రహదారి దెబ్బతింది. దీంతో వాహనాల రాకపోకలు నిలిచిపోయాయి. ఆటోలు కూడా గ్రామానికి వెళ్లలేని పరిస్థితి ఏర్పడింది. దీంతో చేసేదేమీ లేక సుకరమ్మ తన కుమార్తెను భుజాలపై ఎత్తుకుని కొండదారుల్లో నడక ప్రారంభించింది. సుమారు ఏడు కిలోమీటర్లు నడిచి దబ్బగుంట ప్రాంతానికి చేరుకుంది. అక్కడి నుంచి ఆటోలో ఎస్.కోటలోని ఓ ప్రైవేటు ఆసుపత్రికి వెళ్లి కుమార్తెకు వైద్యం చేయించింది.

అనంతరం తిరుగు ప్రయాణంలోనూ అదే కష్టాన్ని ఎదుర్కొంది. దబ్బగుంట నుంచి కుమార్తెను భుజాలపై మోసుకుంటూ మరో ఏడు కిలోమీటర్లు నడిచి గ్రామానికి చేరుకుంది. బిడ్డను కాపాడుకోవాలనే ఆ తల్లి తపన స్థానికులను కదిలిస్తోంది.

ఎనిమిదేళ్లుగా పూర్తికాని రహదారి నిర్మాణం

పల్లపుదుంగాడ గ్రామానికి సుమారు 6.5 కిలోమీటర్ల మేర రహదారి నిర్మించేందుకు ప్రధానమంత్రి గ్రామ సడక్ యోజన పథకం కింద ఎనిమిదేళ్ల క్రితమే రూ.4.90 కోట్ల నిధులు మంజూరయ్యాయి. అధికారులు పనులు ప్రారంభించినప్పటికీ అటవీశాఖ అనుమతుల గడువు ముగియడంతో నిర్మాణం మధ్యలోనే నిలిచిపోయింది. ఆ తర్వాత నిర్మాణ వ్యయం పెరిగి రూ.6.50 కోట్లకు చేరింది. దీంతో అధికారులు కొత్త అంచనాలతో ప్రతిపాదనలు పంపినప్పటికీ ఇప్పటివరకు అనుమతులు రాలేదు.

అత్యవసర పరిస్థితుల్లో ఇబ్బందులు

వర్షాలు కురిసినప్పుడు గ్రామానికి వాహనాలు వెళ్లలేకపోతున్నాయని స్థానిక గిరిజనులు ఆవేదన వ్యక్తం చేస్తున్నారు. అనారోగ్యంతో బాధపడుతున్న వారిని ఆసుపత్రులకు తరలించేందుకు తీవ్ర ఇబ్బందులు ఎదుర్కొంటున్నామని చెబుతున్నారు. అత్యవసర సమయాల్లో రోగులను భుజాలపై మోసుకెళ్లాల్సిన పరిస్థితి ఏర్పడుతోందని వాపోతున్నారు. ఇప్పటికైనా అధికారులు స్పందించి నిలిచిపోయిన రహదారి నిర్మాణ పనులను పూర్తి చేయాలని గ్రామస్థులు కోరుతున్నారు.