పిల్లల ఇంటర్నెట్ హక్కు ప్రాథమిక హక్కు: సుప్రీంకోర్టు - రాజకీయ ప్రభంజనం

నిషేధాలు పరిష్కారం కావు

పిల్లలు సామాజిక మాధ్యమాలను వినియోగించకుండా పూర్తిగా నిషేధించడం వల్ల వారు సురక్షితంగా ఉంటారనే హామీ లేదని సుప్రీంకోర్టు అభిప్రాయపడింది. చట్టపరమైన ఆంక్షలు విధించినప్పటికీ పిల్లలు ఇతర అనియంత్రిత వెబ్సైట్లు, వేదికల వైపు వెళ్లే ప్రమాదం ఉందని హెచ్చరించింది. అలాంటి వేదికల్లో భద్రతా చర్యలు తక్కువగా ఉండటంతో మరిన్ని సమస్యలు ఎదురయ్యే అవకాశం ఉందని పేర్కొంది.

ఆన్లైన్లో వేధింపులు, బెదిరింపులు, లైంగిక దోపిడీకి గురైన పిల్లలు తమ తల్లిదండ్రులకు లేదా పెద్దలకు విషయం చెప్పేందుకు కూడా భయపడవచ్చని ధర్మాసనం ఆందోళన వ్యక్తం చేసింది. ఇంటర్నెట్ వినియోగించినందుకు శిక్షిస్తారనే భయంతో వారు ఫిర్యాదు చేయకపోతే, నేరగాళ్లకు మరింత అవకాశం లభిస్తుందని తెలిపింది. అందువల్ల పిల్లలను కాకుండా హానికరమైన సమాచారాన్ని సృష్టించే, వ్యాప్తి చేసే వ్యక్తులను, వాటిని తొలగించడంలో విఫలమయ్యే సంస్థలను బాధ్యులుగా చేయాలని సూచించింది.

ప్రత్యేక చైల్డ్ మోడ్ అవసరం

పిల్లల భద్రత కోసం సామాజిక మాధ్యమ సంస్థలు ప్రత్యేక చర్యలు తీసుకోవాలని కోర్టు సూచించింది. పిల్లల ఖాతాలు మొదటి నుంచే ప్రైవేట్గా ఉండేలా చూడాలి. గుర్తు తెలియని పెద్దలు వారిని సంప్రదించకుండా, సందేశాలు పంపకుండా నియంత్రణలు ఏర్పాటు చేయాలి. పిల్లలకు కనిపించే ప్రకటనలు, ఇతర సమాచారాన్ని కూడా తగిన విధంగా పర్యవేక్షించాలి.

చిన్న వయసు పిల్లలు సామాజిక మాధ్యమాల్లో ఖాతాలు ప్రారంభించేటప్పుడు తల్లిదండ్రుల అనుమతి, పర్యవేక్షణకు ప్రాధాన్యం ఇవ్వాలని సూచించింది. ఇందుకోసం ప్రత్యేకంగా చైల్డ్ మోడ్ సదుపాయాన్ని అందుబాటులోకి తీసుకురావాలని పేర్కొంది. అయితే, వయసు ఆధారంగా ఆంక్షలు విధించే సమయంలో ప్రతి వినియోగదారుడి వ్యక్తిగత వివరాలను నిరంతరం సేకరించడం, పర్యవేక్షించడం వల్ల గోప్యతకు ముప్పు ఏర్పడుతుందని హెచ్చరించింది.

పాఠశాల స్థాయి నుంచే డిజిటల్ అవగాహన

పిల్లలకు ఇంటర్నెట్లో ఎదురయ్యే ప్రమాదాలపై చిన్న వయసు నుంచే అవగాహన కల్పించాలని సుప్రీంకోర్టు పేర్కొంది. వ్యక్తిగత సమాచారాన్ని ఎలా కాపాడుకోవాలి, అపరిచితుల నుంచి వచ్చే సందేశాల పట్ల ఎలా అప్రమత్తంగా ఉండాలి, ఆన్లైన్ వేధింపులు ఎదురైతే ఎవరిని సంప్రదించాలి అనే అంశాలను బోధించాలి.

అలాగే, సమ్మతి, వ్యక్తిగత హద్దులు, సురక్షితమైన మరియు అసురక్షితమైన ప్రవర్తన, ఆన్లైన్ మోసాలు, లైంగిక వేధింపుల గురించి వయసుకు తగిన రీతిలో విద్య అందించాలి. డిజిటల్ భద్రత, లైంగిక విద్య వేర్వేరు అంశాలు కావని, పిల్లల రక్షణలో రెండింటికీ ప్రాధాన్యం ఉందని ధర్మాసనం పేర్కొంది. తల్లిదండ్రులు, ఉపాధ్యాయులకు కూడా ఈ అంశాలపై శిక్షణ అవసరమని అభిప్రాయపడింది.

పిల్లలకు హాని కలిగించే లైంగిక దోపిడీ సమాచారాన్ని గుర్తించి తొలగించేందుకు సామాజిక మాధ్యమ సంస్థలు సమర్థమైన సాంకేతిక పరిజ్ఞానాన్ని వినియోగించాలని కోర్టు సూచించింది. కేంద్ర ప్రభుత్వం కూడా ఈ వ్యవస్థను పటిష్ఠం చేసేందుకు చర్యలు తీసుకోవాలని పేర్కొంది. హానికరమైన సమాచారాన్ని తొలగించడంలో నిర్లక్ష్యం చేసే సంస్థలపై బాధ్యతను నిర్ధారించే విధానాలు అవసరమని తెలిపింది.