మహిళల్లో గుండె జబ్బుల ముప్పును ముందుగానే గుర్తించి, నివారించేందుకు అమెరికాకు చెందిన నాలుగు ప్రముఖ వైద్య సంస్థలు సంయుక్తంగా కొత్త మార్గదర్శకాలను విడుదల చేశాయి. బాల్యం నుంచి రుతుక్రమం, గర్భధారణ, మెనోపాజ్ వరకు మహిళల జీవితంలోని వివిధ దశల్లో హార్మోన్ల మార్పులు గుండె ఆరోగ్యంపై ఎలాంటి ప్రభావం చూపుతాయో ఈ మార్గదర్శకాలు వివరిస్తున్నాయి.
అమెరికన్ హార్ట్ అసోసియేషన్ (), అమెరికన్ అకాడమీ ఆఫ్ పీడియాట్రిక్స్ (), అమెరికన్ కాలేజ్ ఆఫ్ అబ్స్టెట్రిషియన్స్ అండ్ గైనకాలజిస్ట్స్ (), సొసైటీ ఫర్ మెటర్నల్-ఫీటల్ మెడిసిన్ () కలిసి ఈ మార్గదర్శకాలను రూపొందించాయి. వీటిని మూడు పరిశోధనా పత్రాల రూపంలో విడుదల చేశాయి.
మహిళల గుండె ఆరోగ్యానికి ప్రత్యేక విధానం
సాధారణంగా గుండె జబ్బుల ప్రమాదాన్ని అంచనా వేసేటప్పుడు రక్తపోటు, కొలెస్ట్రాల్, మధుమేహం, బరువు వంటి అంశాలను పరిగణనలోకి తీసుకుంటారు. అయితే, మహిళల్లో హార్మోన్ల మార్పులు, రుతుక్రమ చరిత్ర, గర్భధారణ సమయంలో ఎదురైన సమస్యలు కూడా భవిష్యత్తులో గుండె ఆరోగ్యంపై ప్రభావం చూపుతాయని కొత్త మార్గదర్శకాలు స్పష్టం చేస్తున్నాయి. ఈ నేపథ్యంలో ఫిమేల్ లైఫ్ స్టేజ్ ఫ్రేమ్వర్క్ పేరుతో మహిళల జీవితంలోని నాలుగు ప్రధాన దశలను గుర్తించారు.
మహిళల జీవితంలోని నాలుగు దశలు
1. రుతుక్రమం ప్రారంభమయ్యే దశ: సాధారణంగా 8 నుంచి 15 ఏళ్ల మధ్య మొదటి రుతుక్రమం ప్రారంభమవుతుంది. ఈ దశలో హార్మోన్ల మార్పులతో పాటు శారీరక ఎదుగుదల, జీవనశైలి అంశాలను గమనించాలి. రుతుక్రమం సక్రమంగా లేకపోవడం, అధిక రక్తస్రావం వంటి సమస్యలను నిర్లక్ష్యం చేయకూడదు. 2. పునరుత్పత్తి దశ: సుమారు 15 నుంచి 44 ఏళ్ల మధ్య మహిళల్లో సాధారణంగా రుతుచక్రం కొనసాగుతుంది. ఈ సమయంలో హార్మోన్ల ప్రభావం, జీవనశైలి, మానసిక ఒత్తిడి, గర్భధారణ వంటి అంశాలు గుండె ఆరోగ్యంతో ముడిపడి ఉంటాయి. 3. మెనోపాజ్కు ముందు దశ: సాధారణంగా 45 నుంచి 51 ఏళ్ల మధ్య ఈ మార్పులు కనిపిస్తాయి. ఈ సమయంలో హార్మోన్ల స్థాయులు మారడం వల్ల కొలెస్ట్రాల్, రక్తపోటు, రక్తంలో చక్కెర స్థాయులపై ప్రభావం పడవచ్చు. వేడి ఆవిర్లు, నిద్రలేమి వంటి సమస్యలు కూడా ఎదురవుతాయి. 4. మెనోపాజ్ తర్వాతి దశ: సాధారణంగా 51 ఏళ్ల తర్వాత ఈ దశ ప్రారంభమవుతుంది. ఈ సమయంలో గుండెపోటు, గుండె వైఫల్యం, పక్షవాతం వంటి సమస్యల ప్రమాదం పెరిగే అవకాశం ఉంటుంది. అందువల్ల క్రమం తప్పకుండా ఆరోగ్య పరీక్షలు చేయించుకోవాలని నిపుణులు సూచిస్తున్నారు.
గర్భధారణ సమయంలోనూ గుండెపై ప్రభావం
గర్భధారణ సమయంలో అధిక రక్తపోటు, గర్భధారణ మధుమేహం, ప్రీ-ఎక్లాంప్సియా వంటి సమస్యలు భవిష్యత్తులో గుండె జబ్బుల ప్రమాదాన్ని సూచించే అంశాలుగా ఉండవచ్చు. అందువల్ల, గర్భధారణకు ముందు, గర్భధారణ సమయంలో, ప్రసవం తర్వాత కూడా గుండె ఆరోగ్యాన్ని పర్యవేక్షించాలని వైద్య సంస్థలు సూచించాయి. ప్రసవం తర్వాత కూడా మహిళల ఆరోగ్యాన్ని నిరంతరం పరిశీలించడం అవసరమని పేర్కొన్నాయి. గర్భధారణ సమయంలో ఎదురైన సమస్యలను వైద్యులకు తెలియజేయడం భవిష్యత్తులో గుండె జబ్బుల ప్రమాదాన్ని అంచనా వేయడానికి ఉపయోగపడుతుంది.
మహిళల గుండె ఆరోగ్యంపై హార్మోన్ల మార్పులతో పాటు మానసిక ఒత్తిడి, ఆందోళన, కుంగుబాటు, నిద్రలేమి వంటి అంశాలు కూడా ప్రభావం చూపుతాయని పరిశోధకులు పేర్కొన్నారు. ముఖ్యంగా మెనోపాజ్కు ముందు, తర్వాత ఈ అంశాలను గమనించడం అవసరమని సూచించారు.
