ఉమ్మడి ఆదిలాబాద్ జిల్లాలో ఇందిరమ్మ ఇళ్లు, రెవెన్యూ అంశాలపై సమీక్ష నిర్వహించేందుకు రాష్ట్ర మంత్రులు జూపల్లి కృష్ణారావు, పొంగులేటి శ్రీనివాస్రెడ్డి సోమవారం నిర్మల్ జిల్లాకు చేరుకున్నారు. ఈ సందర్భంగా రూ.23.35 కోట్ల అంచనా వ్యయంతో చేపట్టనున్న వివిధ అభివృద్ధి పనులకు మంత్రులు శంకుస్థాపన చేశారు.
నిర్మల్లోని సమీకృత కలెక్టరేట్ కార్యాలయానికి చేరుకున్న జిల్లా కలెక్టర్ భవేశ్ మిశ్రా, ఎస్పీ జానకి షర్మిల, ఖానాపూర్ ఎమ్మెల్యే వెడ్మ బొజ్జు పటేల్ స్వాగతం పలికారు. అనంతరం పోలీసులు గౌరవ వందనం సమర్పించారు.
కలెక్టరేట్లో ఉమ్మడి ఆదిలాబాద్ జిల్లాకు సంబంధించిన ఇందిరమ్మ ఇళ్ల నిర్మాణం, రెవెన్యూ అంశాలపై అధికారులతో మంత్రులు సమీక్ష నిర్వహించారు. ఆయా శాఖల పనుల పురోగతి, ప్రజలకు అందుతున్న సేవలు, పెండింగ్ అంశాలపై అధికారులతో చర్చించినట్లు సమాచారం.
మంత్రులు శంకుస్థాపన చేసిన పనులలో గోదావరి పుష్కరాలకు సంబంధించిన రహదారి పనులు, రిజిస్ట్రార్ కార్యాలయాలు, తహసీల్దార్ కార్యాలయాలు, ప్రాథమిక ఆరోగ్య ఉపకేంద్రాల నిర్మాణ పనులు ఉన్నాయి. ప్రభుత్వ కార్యాలయాలు, ఆరోగ్య కేంద్రాలకు అవసరమైన మౌలిక సదుపాయాలను మెరుగుపరచడంతో పాటు రానున్న గోదావరి పుష్కరాలను దృష్టిలో ఉంచుకుని రహదారుల అభివృద్ధికి ప్రభుత్వం చర్యలు చేపడుతోంది.
పనులను నిర్ణీత గడువులోగా పూర్తి చేసేలా అధికారులు చర్యలు తీసుకోవాలని మంత్రులు సూచించారు. ఈ పర్యటనలో నిర్మల్తో పాటు ఆదిలాబాద్, కుమురంభీం ఆసిఫాబాద్ జిల్లాలకు చెందిన ఉన్నతాధికారులు, ప్రజాప్రతినిధులు పాల్గొన్నారు. మంత్రుల పర్యటన నేపథ్యంలో ఆయా జిల్లాల అధికారులు కూడా సమీక్షా సమావేశానికి హాజరయ్యారు.
