మానుగూరు, 2026-11-21
మణుగూరు పైలట్ కాలనీలోని ఎక్సలెంట్ హైస్కూల్ లో క్రీడా వారోత్సవ వేడుకలను శనివారం ఘనంగా నిర్వహించారు. ఈ కార్యక్రమానికి పాఠశాల చైర్మన్ యూసుఫ్ షరీఫ్, కరస్పాండెంట్ యాకూబ్ షరీఫ్, సమీన, నయ్యర్ లు గౌరవ అతిథులుగా పాల్గొన్నారు. ఈ సందర్భంగా చైర్మన్ యూసుఫ్ షరీఫ్ మాట్లాడుతూ ప్రస్తుత సమాజంలో మొబైల్ ఫోన్ల వినియోగం పిల్లలపై చూపుతున్న ప్రతికూల ప్రభావాలను వివరించారు. అవసరానికి మించి మొబైల్ ఫోన్లను ఉపయోగించడం వల్ల విద్యార్థుల చదువు, ఏకాగ్రత, ఆరోగ్యం, క్రమశిక్షణపై ప్రతికూల ప్రభావం పడుతుందని తెలిపారు. తల్లిదండ్రులు పిల్లల పట్ల ప్రత్యేక శ్రద్ధ వహించాలని, వారి ప్రవర్తన, చదువు, అలవాట్లను నిరంతరం గమనించాలని సూచించారు. పిల్లల భవిష్యత్తును తీర్చిదిద్దడంలో తల్లిదండ్రుల పాత్ర ఎంతో కీలకమని, మంచి పెంపకం ద్వారా ఉత్తమ పౌరులను తయారు చేయవచ్చని పేర్కొన్నారు. అనంతరం నయ్యర్ మాట్లాడుతూ విద్యార్థులు జీవితంలో ఉన్నత లక్ష్యాలను నిర్దేశించుకొని, ఆత్మవిశ్వాసం, పట్టుదల, క్రమశిక్షణతో ముందుకు సాగాలన్నారు. అపజయాలకు భయపడకుండా ప్రతి అవకాశాన్ని సద్వినియోగం చేసుకుంటూ విజయాల వైపు పయనించాలని సూచించారు.
కార్యక్రమంలో భాగంగా విద్యార్థులు ప్రదర్శించిన అద్భుతమైన నృత్య ప్రదర్శనలు అందరినీ ఆకట్టుకున్నాయి. ముఖ్యంగా క్రమశిక్షణ, ఐకమత్యం, సమయపాలన వంటి విలువలను ప్రతిబింబించేలా చిన్నారులు ప్రదర్శించిన నృత్యాలు ప్రత్యేక ఆకర్షణగా నిలిచాయి. ఈ క్రీడా వారోత్సవ వేడుకలను పాఠశాల ఇంచార్జిలు వెంకట్, చిత్ర, పి.ఈ.టి. పాషా, సత్య సమన్వయంతో విజయవంతంగా నిర్వహించారు.







